Zarauzko Pentsiodunen Mugimenduak gaur eguerdian hasi ditu berriro ere astelehenetako elkarretaratzeak. Ohikoa den moduan, 12:00etan bildu dira hainbat lagun Lege Zaharren Enparantzan, eta aurrerantzean astelehenero ordu berean elkarretaratzera deitu dituzte herritarrak.
Horrez aparte, Euskal Herriko Pentsiodunen Mugimenduak (EHPM) urte hasieran abiatutako sinadura bilketan 140.000 sinadura lortu dituztela ezagutarazi dute gaurko hitzorduan. Bertan, pentsioak osatzeko sistema bat sortu nahian, 60 urtetik gorako pentsiodunei Lanbide arteko Gutxieneko Soldataren (LGS) pareko diru sarrerak bermatzea eskatzen dute. Horrela, Herri Ekinaldi Legegile (HEL) bat eztabaidatzea eta bozkatzea lortu nahi dute Eusko Legebiltzarrean, maiatzaren 15ean.