Hamar urtez Rockumentalak! zine eta musika zikloa antolatu ostean, I Love Rock kultur elkarteak 2017an eten zuen ibilbidea. Dena dela, elkartea ez zuten desegin eta hausnarketa garai batean murgildu ziren. Orain, kultur elkartea martxan da berriro ere, Zarauzko Udalaren babesarekin, eta Lilly Hiatt musikari estatubatuarraren kontzertua antolatu dute udazkenerakoa. Azaroaren 7an izango da, 20:00ean hasita, Modelo aretoan.
Espainian barrena emango duen biraren barruan izango da Zarautzen; aurrez Madrilen eta Avilesen joko du, eta ondoren, Zaragozan eta Santanderren. Lilly Hiatt country-rock artistekin lotu izan bada ere, Forever izeneko bere azken lana gehiago bideratzen da indie-rock doinuetara. Antolatzaileen esanetan, aukera paregabea eta sekulako luxua izango da artista hau Modelon izatea.
Kontzerturako sarrerak dagoeneko eros daitezke, Modeloko txarteldegian eta Kutxabanken sarreren plataforman, 8,65 euroren truke.