Photomuseumek sustatutako eta Zarauzko Udalak babestutako Gela kultur hedapenerako programaren barruan, Zinemaren historia serieko zazpigarren kapitulua emango dute gaur. Zehazki, 60ko hamarkadako zinema frantziarra eta zinema suediar berria izango dituzte oinarri Photomuseumen, 18:00etan hasiko den saioan. Sarrera doakoa izango da, aretoko edukiera betetzen den arte.
Nouvelle Vague (Olatu Berria) izena eman zion kritikak 1950eko hamarkadaren amaieran sorturiko zinemagile frantziar talde berriari. Talde hori 1960ko hamarkadan bermatu zen. Errealizadore berriek Frantziako zinemak une horretara arte inposatzen zituen egituren kontra egin zuten, eta, ondorioz, beraien helburu nagusia adierazpen askatasuna bultzatzea ez ezik, ekoizpen arloan askatasun teknikoak lortzea ere bazen. Garai horretako protagonistak izan ziren François Truffaut, Jean-Luc Godard, Jacques Rivette, Eric Rohmer, Claude Chabrol eta Jean Pierre Melville.
Suedian, berriz, Ingmar Bergman zine eta antzerki gidoilari eta zuzendariaren lana aztertuko dute gaurko saioan. XX. mendeko bigarren erdiko zinema zuzendari onenetako bat izan zen. Berak zuzendutako bi film ezagun dira Fanny y Alexander eta El septimo sello.