Etxebizitza turistikoen inguruan, edo, behintzat, haiek arautzearen harira Zarauzko EAJk erakutsitako postura kritikatu du EH Bilduk. Ohar baten bidez, koalozioak gai horren inguruan defendatutako proposamenak jeltzaleek atzera bota dituztela salatu dute.
Kritika egiterako orduan, etxebizitza turistikoak arautzeko EUDELek duela egun batzuk aurkeztutako gida jarri du mahai gainean EH Bilduk. Proposamen hark, "arazoa sortu aurretik etxebizitza turistikoak arautzea eta horretarako aldi batez baimenak etetea, turismoaren karga-ahalmena ezartzeko saturazio turistikoa neurtzeko tresnak erabiltzea eta etxebizitza turistikoen errealitatea tentsio eremuak neurtzeko kontuan hartzea" gomendatzen duela azaldu du ezkerreko koalizioak. Haren arabera, ideia edo proposamen horiek "EH Bilduk Zarautzen mahai gainean aspaldidanik jarritako neurri eta proposamenak dira".
Oharrean gogoratu du gai horren inguruan Zarauzko EH Bilduk aurkeztutako proposamenak atzera bota dituela herri horretako EAJk. Horien artean dira, koalizioaren arabera, "EH Bilduk ostatu turistikoen baimen moratoria eskatzeko mozioa aurkeztu genuen eta EAJk kontra bozkatu zuen; turismo plan estrategikoa lantzerakoan, Zarauzko turismo karga-ahalmena neurtzeko eskatu genuen, eta EAJk horretarako beharrik ez zuela ikusten adierazi zuen; eta Zarautz gune tentsionatu izendatu ahal izateko datu azterketa zorrotzagoa egiteko eskatu eta EAJk ezezkoa eman zigun, PSEren mozio baten bitartez proposamen hori aurrera atera zen arte.
Gaineratu du etxebizitza turistikoak udaletako Plan Orokorren bidez arautzea gomendatzen duela udal elkarteak. "Zarauzko Plan Orokorra 2008koa da eta EH Bilduk behin baino gehiagotan adierazi izan du Plana berritzeko beharra dagolea. Gida honetako gomendio honek behar hori berresteko beste arrazoi bat erakusten du".
EH Bilduren ustetan, EUDELek plazaratutako gidak Zarauzko EAJren "noraeza"erakusten du. "Nabarmen gelditu dira EUDELen (non EAJk gehiengoa duen) eta Zarauzko EAJren jarrera kontrajarriak eta jarrera horrek asko zailtzen du etxebizitzaren arazo larriari heltzea eta turismoak sortzen dituen ondorioei aurre egitea".