Urtarrilaren 19an Hamasekin itundutako su etena hautsi eta sarraskia eragin du berriro Israelek Gazan aste honetan, eraso bortitzetan 500dik gora palestinar hilez. Israelen kontrako protestak eta Palestinaren aldeko elkartasun mobilizazioak eragin dituzte azken erasook.
Atzo arratsaldean, Euskal Herriko Kontseilu Sozialistak deituta, Israel estatu terrorista, Palestina askatu! lelopean, Euskal Herriko hamasei herritan egin zituzten elkarretaratzeak, horietako bat Zarauzko Lege Zaharren enparantzan.
Hainbat herritar bertaratu ziren hitzordura, Palestinako banderekin, deialdiaren leloa erakusten zuen pankartaren atzean elkartuta.
Kontseilu Sozialistarentzat "imaginatzea ere kosta egiten den basakeria maila" erakutsi dute azken urte hauetan. Eta egoera horren aurrean, ezinbestekotzat jo dute "antolatzea, mobilizatzea eta borrokatzea, ez bakarrik Israelen aurka, baizik eta bera babesten eta laguntzen duten guztien aurka". Izan ere, “mendebaldeko estatuen babes ekonomiko, politiko eta militarrik gabe, ez litzateke posible izango Palestinan gertatzen ari dena gertatzea, eta hori da ahalbidetzen duena genozidio eta sarraski honek aurrera jarraitzea".
Kontseiluko kideek ere gogora ekarri dute Pedro Sanchez Espainiako presidenteak Israelen gehiegikeria salatzen ari den bitartean, Espainiak armen komertziorako "bazkide nagusietako bat" izan jarraitzen duela Europa osoan, eta "Euskal Herrian ere ez dira gutxi Israelekin harremanak mantentzen dituzten enpresak eta instituzio politikoak".
Bestalde, beren borroka ez dela "Palestinari elkartasuna adieraztera bakarrik mugatuko" gehitu dute, izan ere, "palestinarrei elkartasuna erakusteko eta erresistentziari laguntzeko modu eraginkorrena hemen bertan ditugun erantzuleak seinalatzea, horien aurka borrokatzea eta borroka indartzen jarraitzea baita".
Amaitzeko, sionismoa "proiektu genozida" dela esan dute, eta proiektu horren bitartez, "garbiketa etnikoa" egiten dabiltzala Palestinar herriaren aurka. "Azken finean, sionismoaren berezko ezaugarria da palestinarrak beren lurretatik lekualdatzea. Ez dago Israelek errespetatuko duen su eten posiblerik, ez dagoelako palestinar lurretan bi estatu elkarrekin bizitzeko aukerarik. Palestinarren eta Palestinako herriaren askapenerako ezinbesteko baldintza baita Israelen desagerpena. Segi dezagun helburu horren alde borrokan, Israel suntsitu eta Palestina askatu!".
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!