Hasia da dagoeneko txirrindularitzako errepideko denboraldia, eta emaitza onak ari da lortzen Zarauzko Jira Bira taldea. Zarauzko elkarteak atzo arratsaldez aurkeztu zituen gizonezkoen eta emakumezkoen taldeak Modelo aretoan egin zuten ekitaldian. Ohi bezala, herritar ugari bertaratu zen herriko aretora.
Gizonezkoen eta emakumezkoen talde bana errepideratuko du aurten ere Jira Birak. Jon Etxarri elkarteko kideak adierazi zuenez, hamalau lagunek osatuko dute gizonen taldea. Txirrindulari bat izan ezik, 27 urte dituen Charlie Meredith ingelesa alegia, beste guztiak 23 urtez azpikoak dira. Horietatik 11 euskaldunak dira, eta bakarra Urola Kosta eskualdekoa, Mattin Salegi zumaiarra, hain zuzen. David Etxeberriak zuzenduko du taldea denboraldi honetan ere. Atzo eman zuten jakitera, gainera, 23 urtez azpikoen Euskadiko selekzioko hautatzailea izango dela Etxeberria.
Emakumeen taldean ere eskualdeko txirrindulari bakarra izango du Jira Birak, eta berau Maite Urteaga zumaiarra da. 23 eta 27 urte bitarteko zortzi txirrindularik jantziko dute Zarauzko txirrindulari taldearen mailota denboraldi honetan. Mikel Usandizaga izango dute zuzendari Jirabirako emakumeek.
"Pena da Zarauzko txirrindularirik ez izatea taldean", onartu zuen Etxarrik. Hala ere, azpimarratu zuen Jirabirako talde teknikoa zarauztarrek osatzen dutela.
Hasiera ona
Errepideko denboraldiari hasiera ona eman diote Zarauzko klubeko ziklistek. Hala, gizonetan, Zumaiako proba irabaztetik gertu izan ziren, eta duela egun batzuk jokatutako Extremadurako Itzulian bigarren egin zuen Meredithek. Emakumeetan, berriz, Maite Urteagak garaipena erdietsi zuen pasa den asteburuan Bergaran, eta hurrengo egunetan jokatutako lasterketetan podiumera ere igo zen zumaiarra.
Gizonek, Euskal Herriko proba guztietan hartuko dute parte, eta horiez gain beste bospasei itzulitan ere lehiatuko dira. Emakumeen kasuan, ez daude proba asko, eta batzuetan jubenilekin ere lehiatu beharko dira. Kasu honetan, helburua "talde on bat egitea eta emakumeen txirrindularitza bultzatzea" dela azpimarratu zuen Etxarrik.
Datorren asteburu honetan, neskak Beasainen jokatuko den Espainiako Kopako proban arituko dira; mutilak, berriz, Laukizen egingo den lasterketan.
Omenaldia
Aurreko urteetan bezala, omenaldiari txanda egin zioten atzoko ekitaldian. Usoa Ostolaza txirrindulari zarauztarra omendu zuen Jira Birak atzoko aurkezpen ekitaldian. 23 urterekin hasi zen txirrindularitza munduan Ostolaza, eta iaz Espainiako txapelketa irabazi zuen. "Erakutsi zuen emakumeen txirrindularitzan garaipen handiak lortzea posible dela", nabarmendu zuen Jira Bira kideak.
Ostolazak ezin izan zuen ekitaldian egon, Milan-San Remo proba entzutetsuan parte hartuko duelako. Haren familiartekoak igo ziren Modelo oholtzara haren izenean.