"Gazteen artean ongizate emozionala eta osasun mentala sustatzeko asmoz", Gipuzkoako Foru Aldundiko Gazteria sailak Erasmus+ Youth & Mental Health proiektua jarri du abian. Aste honetan zehar, 18 eta 30 urte bitarteko Gipuzkoako eta Esloveniako 28 gazte ari dira parte hartzen hitzaldi, tailer eta jarduera praktikoetan, eta topaketa Zarautzen egin dute. Egitasmoaren bigarren zatia, aldiz, Esloveniako Maribor hirian egingo dute, apirila amaieran.
Jarduera horietan, besteak beste, autozaintza; asertibitatea; une zailetan pertsonei laguntzea; eta elikadurak, arteak eta kirolak osasun mentalean duten eragin positiboa lantzen dituzte. Isaac Palencia Gazteria zuzendariak adierazi duenez, "ekimen horiekin, aldundiak berretsi egiten du egungo erronka emozional eta sozialei aurre egiteko gazte trebatuagoak eta kritikoagoak prestatzeko konpromisoa".
Gainera, erakundeak gehitu du gazteen ongizate emozionala hobetzeko hainbat ekimen ere sustatu dituela, "elkarrizketarako, hausnarketarako eta ekintzarako guneak" sustatuz. Eta honako ideia azpimarratu du Palenciak: "Erasmus+ programaren bitartez ikus daiteke nazioarteko lankidetzak osasun mentalari buruzko ikuspegiak eta irtenbideak hainbat testuingurutan aberastu ditzakeela eta, aldi berean, Gipuzkoaren eta Esloveniaren arteko loturak indartu ditzakeela".