Espainiako Eskubaloi Federazioak promesa mailako Mediterraneoko Txapelketarako hautatuen zerrenda jakinarazi du, eta horien artean dago Markel Errasti ZKE eskubaloi taldeko jokalaria. Aurtengo txapelketak Tunisia izango du egoitza nagusi, eta bi hiritan banatuta jokatuko dituzte neurketak: hain justu ere, Hammamet eta Nabeul hirietako kantxetan izango dira partidak, apirileko bigarren astean.
Daniel Sanchez-Nieves entrenatzailearen gidaritzapean egongo dira hautatuen zerrendan dauden hamasei jokalariak, eta txapelketa aurreko kontzentrazioa Alcala de Henaresen egingo dute (Madril). Zehazki, jokalariek apirilaren 2an hartuko dute autobusa Madrilgo Atocha tren geltokian, ondoren Alcala de Henaresera joateko. Bertan, txapelketarako prestatzeko asmoz, hainbat entrenamendu saio egingo dituzte, eta apirilaren 5ean bidaiatuko dute Tunisiara.
Partiden egutegia txapelketaren aurretik egingo duten bilera baten bitartez zehaztuko dute. Horrez aparte, federazioak aurreikusi du apirilaren 14an itzuliko dela taldea etxera.
Jubenil neskak, txapeldun
Duela hilabete eskas jubenil neskek jokatu zuten Mediterraneoko Txapelketa Podgorican (Montenegro), eta Espainiako selekzioa jaun eta jabe izan zen bertan. Garaipenaren parte izan zen ZKE Eskubaloi taldeko Elene Fresco, Espainiako selekzioarekin jokatu baitzuen txapelketa.
Greziaren, Txipreren, Serbiaren, Errumaniaren eta Esloveniaren aurkako ligaxkan lehen postua eskuratu ostean, Montenegroren aurka neurtu zituen indarrak Espainiak final handian. Lehia estu baten ostean, 14-19ko markagailuarekin urrezko domina eskuratu zuen Cristina Cabezaren taldeak.