Zarauztarra Txirrindulari Kirol Elkarteak antolatuta, XXXIV. Zarauztarra Saria jokatuko da bihar goizean herrian. Gipuzkoa mailako kadete kategoriako lasterketa izango da, eta hainbat txirrindulari gaztek hartuko dute bertan parte.
Probari 09:30an emango diote hasiera, eta txirrindulariek Zumaiara abiatuko dira kostako errepidetik; ondoren, Oikiatik Meagara igoko dira, jarraian Zarautzera jaisteko. Zirkuituari beste itzuli bat eman eta gero, Nafarroa kaleko helmugan amaituko da lasterketa, 10:37 aldera.
Gaztetxoen txirrindulari lasterketa dela eta, beharren arabera, goizean zehar trafiko mozketa puntualak izango direla jakinarazi du Zarauzko Udalak. Mozketa horiek, batez ere, Nafarroa kalean (N-634) eta Meagako errepidean eragingo dute.