Esteban Oroz margolari etxauriarraren erakusketa aurkeztuko dute martxoaren 19an, asteazkenarekin, Arkamin. Arratsaldeko 18:30etik aurrera zabalduko dute galeria, eta bertaratzen direnek artistarekin hitz egiteko aukera izango dute.
Orozen pintura figuratiboa bezala definitzen da, eta "intuizioari jarraituz" sortzen ditu artelanak, izan ere, ez baititu estiloak, modak eta joerak atsegin. "Ezinbestekoa" iruditzen zaio bere koadro bakoitzean argia menderatzea; hau da, argi naturala interpretatzea eta islatzea; hortaz, bere artelan ezberdinak lotzen dituena argia dela esan daiteke.
Hainbat teknika lantzen ditu, besteak beste pastelak, akrilikoak, akuarelak eta olioak. Gainera, hainbat gai jorratu ditu bere ibilbidean zehar: paisaiak, erretratuak edota itsasoko irudiak. Horietako hainbat izango dira ikusgai Arkamin.
