Otsailaren 15ean maila goreneko eskalatzaileek jokatu zuten Klimb Zarautz Masters txapelketa; atzokoan, afizionatuen txanda izan zen. 09:00etatik hasita, II. Klimb Open txapelketan lehiatu ziren eskalatzaileak Klimb Zarautz rokodromoan. Udane Mugika eta Asier Antunez izan ziren txapeldunak.
Parte hartu zuten guztien artean, lehiakortasunaz harago, laguntasuna eta giro paregabea nagustu ziren. Guztira, 25 bloke izan zituzten egiteko, eta epaimahaiak bloke horietatik hemezortzi onenak izan zituen kontuan puntuatzeko.
Hori horrela, neskei dagokienez, bigarren eta hirugarren postuak Maddi Agirrerentzat eta Leire Monrealentzat izan ziren, hurrenez hurren. Mutilen kategorian, berriz, Mikel Cuerdak eskuratu zuen bigarren postua, eta Anxo Albisuk hirugarrena.
Gaur, topaketa
Asteburua agurtzeko beste hitzordu bat izango dute gaur Klimb Zarautz rokodromoan. Izan ere, iazko arrakastaren ostean, II. Eskalatzaile Txikien Topaketa antolatu dute. 09:00etatik aurrera egongo da zabalik rokodromoa, eta iluntzera arte gozatuko dute eskaladaz bertan.