Hainbat herritar gerturatu ziren atzo arratsaldean Merkatu Plazara urteroko Zarautz Abesbatzaren Maitasun Kontzertua entzutera. Aurtengoan 11 abestiz osatutako errezitaldia eskaini zuten, Jaione Eskudero abesbatzako zuzendariak gidatuta. Antxon Sarasua, aldiz, teklatuarekin laguntzen aritu zen.
Maitia nun zira abestiarekin eman zioten hasiera emanaldiari, eta jarraian zenbait klasiko ere entzun ziren, Rossignolet gentil, Jardin bat zuretzat edota Cyndi oi Cyndi, besteak beste.
Kontzertuan zehar hunkitutako asko ikusi ahal izan ziren entzuleen artean, baita beste hainbat albokoari besarkatuz kantatzen ere. Gainera, herritarrek abesbatzarekin batera abestu ahal izan zituzten pare bat kanta, hala nola Juan Inazio Iztuetaren Kontxexiri eta Anje Duhalderen Maitasun aroak.
Bestalde, merkatuko lehen solairutik ez ezik, beste hainbat herritar elkartu ziren kontzertua beheko solairutik entzutera.