Anjel Lertxundi idazlearen ibilbide oparoaren inguruan, Anjel Lertxundi: idazlea eta obra uda ikastaroa antolatu zuten 2023an. Orain, Euskal Herriko Unibertsitatearen Gabriel Aresti Bildumak ikastaro hartako hitzaldiak jaso ditu izenburu bereko liburu batean, baita Lertxundiren omenez Zarautzen eginiko ekitaldietan eskainitakoak ere.
Beatriz Zabalondo eta Alexander Gurrutxaga izan dira saiakera liburua ontzeaz arduratu direnak. Bertan jasotako idatziek Lertxundiren obraren alderdi asko jorratzen dituzte, talaia ezberdinetatik begiratuta, sakon eta zorrotz.
Egindako lanaren nondik norakoen berri emateko, martxoaren 7an aurkezpen saioa eskainiko dute Zabalondok eta Gurrutxagak, 18:30etik aurrera, Garoa liburu dendan.