Pagoeta Mendizale Elkarteak urteko azken emanaldia eskainiko du ostegun honetan bere lokalean. Hitzordurako, Zarauzko bizilagun Iñaki Peña medikuak 2020an zuzendutako Mendian hil, hirian hil dokumentala aurkeztuko du, 19:00etatik aurrera.
Ikus-entzunezkoak heriotzari buruzko hausnarketa bilduma bat jasotzen du; bertan, mendian norbait galdu duten gurasoak, anai-arrebak edota lagunak dira protagonistak. "Kameraren aurrean, beren bihotza irekiko digute, eta heriotzak sortarazi zizkien sentipenak kontatuko dizkigute. Haien laguntzarekin, heriotzaz asko ikasiko dugu eta, aldi berean, bizitzaz ere bai", nabarmendu dute Pagoetako kideek.