El caso Freytter dokumentala ikusi ahal izango da gaur, 18:30ean, Arranoko bunkerrean. Pizza-poteaz gozatu ahal izango dute bertaratzen direnek eta, gainera, emankizunaren ondoren solasaldia egingo dutela ere aurreratu dute: hain zuzen ere, Kolonbiako egiaz eta justiziaz jardungo dute hizketan.
Tonio Heckerrek zuzendutako lana da El caso Freytter. Jorge Freytter Kolonbiara itzultzen da hamazazpi urte erbestean eman eta gero, bere aita Jorge Adolfo Freytterren hilketa ikertzeko asmoz. Freytter irakasle, abokatu eta sindikalista 2001eko abuztuaren 28an bahitu zuten, eta egun bat geroago aurkitu zuten hilda, tortura zantzuekin.