Urdanetan amaitu dituzte sanmartinak, eta San Martin egunaren bezperan, igandean, egitarau oparoa izan zuten, gainera.
Besteak beste, harri jasotzen aritu ziren auzotarren aurrean. 150 kiloko Markesko harri kubikoarekin egin zuten lehia Iraitz Arruti, Xabat Olaizola, Paulo Azpiazu eta Hodei Iruretagoiena Izeta IV.a harri jasotzaileek. Ainitze Zumetak, berriz, erakustaldia egin zuen 75 kiloko zilindroarekin eta 70 kiloko baldarrarekin. 18 eta 11 jasoaldi eman zizkien harriei, hurrenez hurren.
Txapelketari dagokionez, bost minutuko txandetan aritu ziren, eta Paulo Azpiazuk egin zituen jasoaldi gehien, 14 guztira. Xabat Olaizola izan zen bigarren, 11 jasoaldirekin. Izeta IV.ak bederatzi jasoaldi lortu zituen, eta Iraitz Arrutik, berriz, sei.
Jaietako egitarauan iragarrita zegoen Mikel Lopetegi Urraren parte hartzea, baina azkenean ez zen Urdanetan izan.
