Martxan da aurtengo Mintzalagun programa, eta atzo, ikasturteari hasiera emateko ekitaldia egin zuten Zarautzen. Bertan izan ziren Eider Arruti Albaolako kidea eta Ibon Gaztañazpi Errio dokumentalaren zuzendaria, irailean estreinatu zuen lanaren nondik norakoak kontatzen. Hainbat herritar eta ikasle gerturatu ziren bikotea entzutera.
Mintzalagun egitasmoak euskaraz dakiten pertsonak –bidelagunak– euskara ikasten ari direnekin –bidelariak– elkartzen ditu, astean ordubetez, euskaraz aritu daitezen. Horrek aukera ematen die euskara doan eta denbora librean praktikatzeko. Egitasmoko antolatzaileek jakinarazi dute, ikasturte honetan 90 bat lagunek parte hartu dutela Urola Kostan, eta "gehiago animatzea" espero dutela.
Mintzalagun programan izena emateko, internetez egin daiteke, baita 625 485 215 telefono zenbakira deituta edo urolakosta@aek.eus helbidera mezua bidalita.