2025eko udal aurrekontuak osatzeko, herritarren proposamenak jasotzen ari da Zarauzko Udala. Herritarrek ideiak helarazteko hainbat aukera dituzte horretarako; batetik, horretarako propio jarri dituzten postontziak erabiliz edota telematikoki; eta, bestetik, udal ordezkariak auzoz auzo egiten ari diren bileretan.
Dagoeneko lau bilera egin dituzte, eta aste honetan beste bi egingo dituzte: bihar, urriaren 22an, asteartean, Iñurritzako Jubilatuen Elkarteko goiko solairuan, 18:30ean, Iñurritza, Mendilauta eta Talaimendiko bizilagunentzat; eta urriaren 24an, ostegunean, Aritzbatalde kiroldegiko 8. aretoan, 18:30ean, Zelai Ondo, Aritzbatalde, Mitxelena eta Salberdin auzokoentzat.
Bestalde, postontziak ondorengo tokietan topatuko dituzte herritarrek: Vista Alegre auzo elkartean, Etxezabalan eta Portuetxen, Sanz Enean, Udal Euskaltegian, Azken Portuko Kristau Biltokian, Aritzbatalde kiroldegian eta Iñurritzako auzo elkartean. Telematikoki ekarpenak egin nahi dituztenek, berriz, partehartu@zarautz.eus posta elektronikora idatzi dezakete edo udalaren webguneko Parte hartu atalean sartu.