2019ko azaroan sortu zuten Nabasi taldea, bertako lau kideak hainbat talderekin ibili eta gero elkartu zirenean. "Iñigo, Peteko, Lander eta Patino elkartu ginen, eta pandemia tarteko Petekok taldea utzi ostean, Ion batu zitzaigun proiektura mikroaren ardura hartzeko prest", adierazi du taldeak sare sozialen bitartez.
Behin-betiko laukotea osatuta, eta "inongo muga estilistikorik gabe baina emo eta post-hardcorea oinarri hartuta", abestiak sortzen hasi zen taldea, diskoari forma emateko asmotan.
Horiek osatuta, Azküe Soinua estudioan grabatu dute diskoa, Iñigo Azkueren gidaritzapean, eta Víctor Garciak masterizatu du Ultramarinos Costa Bravan. LAHAR osatzen duten zortzi kantak "autosufizientzia ariketa bat direla" azaldu du taldeak, "lau pareten artean sortutako unibertso bitxi eta bereziaren islada moduan".