Nadia Erostarbe surflari zarauztarra gaur hasiko da lehian Parisko Olinpiar Jokoetan. Teahupooko uharrian da jada (Tahiti, Polinesia Frantsesa), eta atzoko aurkezpen ekitaldian ere azaldu zen Andy Criere eta Janire Gonzalez Etxabarrirekin batera. Hori horrela, Zarauzko Udalak etxeko kirolaria zuzenean ikusteko aukera eskainiko die herritarrei, 23:30etik aurrera, Modelo aretoan, doako sarrerarekin.
Zortzi txandaz osatuta egongo da gaurko jardunaldia, eta bakoitzean hiruna surflari ariko dira nor baino nor. Erostarbe azken aurrekoan izango da, zazpigarrenean; ikuspenen arabera, hemengo 02:00 aldera edo. Gonzalez Etxabarri, berriz, bigarrenean ariko da.
Lehen sailkatua zuzenean pasatuko da final-zortzirenetara eta beste biek bigarren aukera bat izango dute. Final-zortzirenetatik aurrera buruz burukoak izango dira kanporaketak.