Zarautz Kirol Elkarteak antolatuta, asteburuan jokatu dute Futsal Cup txapelketako lehenengo edizioa. Partidak Aritzbataldeko kiroldegian eta Lizardiko kirol gunean izan ziren. Larunbatean lau multzoen faseak jokatu zituzten eta atzo, kanporaketen eta finalaren txanda izan zen.
Semifinaletara, alde batetik Vodka Juniors eta Minavo de Kiev, eta bestetik, Puristak eta Joga Bonito taldeak iritsi ziren. Kanporaketa hauetatik, Vodka Juniors eta Puristak sailkatu ziren. Norgehiagoka estua izan zen, izan ere, Puristak taldeko jokalariek lortu zuten garaipena 4-3 emaitzarekin. Bestalde, Jogo Bonito taldeak hirugarren postua eskuratu zuen, 6-0 emaitzarekin.
Irabazleek garaikurra, dominak, taldeko afaria eta kirol-jertseak jaso zituzten, eta txapeldun ordeek, aldiz, kopa eta taldeko afaria. Hirugarren sailkatuei surf klaserako bonua eman zitzaien. Banakako sariak ere banatu zituzten, besteak beste, Kaleb Arthur golegile onenari.