ZKEren Areto Futboleko sailak antolatuta, Zarautz Futsal Cup txapelketako lehenengo edizioari ekin diote gaur goizean. 09:00etatik 13:00etara bitartean jokatu dituzte partidak, Aritzbatalde kiroldegian eta Lizardi kirol aretoan, eta ordu erdiko iraupena izan dute. Gaurkoan guztira hemezortzi partida jokatu dituzte.
A multzoan, Vodka Juniors eta Zalditxoak taldeak sailkatu dira, bakoitza 6 punturekin; B multzoan, Drillers eta Puristak taldeak, 6 eta 3 punturekin; C multzoan, aldiz, Minavo de Kiev eta Gold Rush taldeak sailkatu dira, bakoitza 5 punturekin; eta azkenik, Jogo Bonito eta Koko KFC taldeek lortu dute puntuazio onena, 6 eta 3 punturekin. Multzoen fasea amaituta kanporaketei ekingo diete, eta bihar hasi eta amaituko dituzte. Multzo bakoitzetik bi talde sailkatuko dira final-laurdenetara eta finala 12:30ean izango da Aritzbatalden.
Sariei lotuta, areto futboleko atalak jakinarazi du irabazleak garaikurra, dominak, taldeko afaria eta kirol-jertseak jasoko dituela, txapeldun ordeak kopa eta taldeko afaria, eta, hirugarren sailkatuek surfeko klasea. Horrez gain, banakako sariak ere izango dira txapelketan nabarmentzen diren jokalarientzat: futbolari onenak, atezain onenak eta golegile nagusiak irabaziko dituzte eta kopa eta herriko dendetan gastatzeko bonua emango diete denei. Beste hainbat opari ere emango dituzte zozketa bidez.