Pagoeta mendizale elkarteak antolatuta, Uganda bizikletan dokumentalaren proiekzioa egingo dute gaur Santa Marinako elkartearen egoitzan, 19:00etan hasita.
Bertan izango dira ikus-entzunezkoaren protagonistak, Maider Larrañaga eta Txetxu Lete, eta beraiek Afrikan bizikleta bidez egindako bidaia izango dute hizpide. "Afrikan beste erritmo batean bizi dira. Guk erlojuak ditugu eta haiek denbora. Eskuzabalik eta irribarre batekin hartu gaituzte pasatu ditugun herrixka guztietan, muzungu-muzungu esanez. Sinpletasuna bizitzaren esentzia dala erakutsi digute", azpimarratu dute.