Datorren ekainaren 6an, ostegunean, 18:30etik aurrera, Santa Klarako proiektuaren egoeraren azalpenak emateko aurkezpen publikoa egingo dute. Bertan izango dira udal ordezkariak, teknikariak eta proiektua idazten ari den arkitekto taldea. Saioa Santa Klaran egingo dute, Astazubi plazaren parean dagoen sarbidean egongo da sarrera.
2021. urtean erosi zuen Zarauzko Udalak Santa Klara eraikina. Kultura ekipamendu bat eraikitzeko helburua dute, udalerriko pertsonen arteko topaketa erraztuko duen gunea, hain zuzen. Hortaz, ikaskuntzarako, sorkuntza artistikorako, eta esperimentaziorako guneak esleitu daitezke, pertsonek kultura praktika, prozesu eta esperientzia gisa bizi ahal izateko.