Gaur jokatu dute Tolosako zezen plazan Gazteen Mailako Euskal Pentatloiaren I. edizioa, eta lanak ondo baino hobeto eginda, Jakes Iruretagoiena Izeta V.ak lortu du txapela jaztea. Jon Zaldua Zaldua II.a baino 22 segundu gutxiago behar izan ditu bere lanak egiteko, hain zuzen ere, 12 minutu eta 55 segundu.
Honako lanak egin behar izan dituzte: 63 kiloko bola zortzi aldiz altxatu dute, 250 kiloko harriarekin plaza bat egin dute, kana erdikoa ebaki dute, 35 kiloko txingekin hiru plaza egin dituzte eta zezen plazari 10 itzuli eman dizkiote korrika (kilometro bat).
Maddi Gesalagak ere ederki egin ditu bere etxeko lanak. 125 kiloko errektangular zaharra altxatzea zuen helburu marka ezartzeko, eta lortu egin du. Zarauztarra hunkituta ikus zitekeen harria altxatu berritan, eta publikoari besoak altxatuz borobildu du goiza.