Ostiralean jokatu zuten Zarauzko Emakumeen II. Pala Txapelketako finala, eta bertan erabaki zituzten lehiaketako lehen lau postuak zeinentzat izango ziren. Hain zuzen, Jone Azkoagak eta Karmele Martinez de Cabredok Jone Iruretagoiena eta Mireia Aizpurua garaitu zituzten, bi setak irabazi ostean.
Hirugarren postua, aldiz, Lorea Laburu eta Miren Lertxundirentzat izan zen, eta laugarren gelditu ziren Saioa Iraola eta Maialen Manterola. Set bana irabazi zuen bikote bakoitzak, eta hirugarrengoan erabaki zituzten hirugarren eta laugarren postuak. Guztira, hamasei bikote aritu dira aurtengo edizioan, eta parte hartzaileek azaldutakoaren arabera, "giro ederrean" jokatu dute txapelketa. Orain dela bi urte bederatzi bikotek jokatu zuten txapelketa bera.