Bihar egingo dute Zarauzko Argazkizale Elkarteak antolatutako Fernando Maiztegiren Oroimenezko 41. Argazki Rallya. Parte hartu nahi duten argazkilariek elkartearen Ebro Etxeko egoitzan eman beharko dute izena bihar bertan, 09:00etatik 10:00etara: helduek 10 euro ordaindu beharko dute, eta 16 urtez azpikoentzat doakoa izango da.
Rallya hasi aurretik zehaztuko zaizkie argazkilariei landu beharreko gaiak. Bukaeran, 13:00etatik 14:00etara bitartean, partaide bakoitzak elkartearen egoitzan aurkeztuko ditu bere argazkiak –gehienez ere 36, lehen kontrolekoa barne–, eta horiek ordenagailu batera deskargatuko dituzte. Ondoren, partaide bakoitzak gai bakoitzari buruz argazki bana aukeratu eta rallyzarautz2022@gmail.com posta elektronikora bidali beharko du maiatzaren 25erako, larunbata.
Irabazleak 160 euro eta Andra Mari Zeruratzearen garaikurra jasoko ditu; bigarren egiten duenak 130 euro eta garaikurra; eta hirugarrenak, 100 euro eta garaikurra. Bestelako bi sari ere banatuko ditu elkarteak: rallyko argazki ederrena egiten duenak 80 euro jasoko ditu, eta 16 urtez azpiko lehen sailkatuak, berriz, garaikurra. Sari guztiek izango dute dagokien zerga atxikipena eta ekainaren 21ean, ostirala, egingo dute sari banaketa ekitaldia Torre Luzea erakusketa aretoan.