Aste hasieratik ikusgai dago Photomuseum argazki eta zinema museoan Basques in Australia aldi baterako erakusketa, eta horrekin lotuta, hitzaldia eskainiko du gaur Esther Korta aditu eta erakusketako komisarioak museoan bertan. 18:00etan izango da hitzordua, eta hitzaldia euskaraz izango da.
Herriz herri erakusten ari diren argazki mostra ibiltaria da Photomuseumekoa, eta 50eko hamarkadaren amaieran Australiara joandako euskal diaspora du ardatz. Zehazki, 1958 eta 1960 urteen artean egindako Kanguro, Eukaliptus, Emu, Karry eta Torres operazioetan nahiz Marta Plana deiturikoaren barruan Euskal Herritik hara joan ziren ehunka lagunen itsasontzi bidaia eta Australian sortu zuten euskal komunitatea erakusten ditu.