Tindufeko (Algeria) errefuxiatuen kanpalekuetan diren sahararrek aurki jasoko dituzte elkartasun karabanaren barruan bertara eramango dituzten jakiak eta bestelako materialak. Larunbat goizean abiatu ziren Donostiatik hainbat kamioi Bizkaian eta Gipuzkoan bildutako 80 tona laguntza eramateko. Tartean, Zarautzen Saharautz Gobernuz Kanpoko Erakundeak egindako kanpainan jasotako 4,5 tona.
Saharautzeko kideek azaldu dutenez, Donostiako DBuseko hainbat txoferrek gidatu zituzten Alacanteraino (Herrialde Katalanak), eta Oranera (Algeria) eramango dituzte orain. Azken aurreko geldialdia izango da hori laguntza errefuxiatuen kanpalekuetako sahararren artean banatu aurretik.