Gela programaren barruan, Photomuseumek aurreko astean abiatu zuen Marx anaien inguruko saioa, eta bihar arratsaldean bigarren proiekzio emanaldia egingo dute; ohi bezala, 18:00etan hasiko da, doako sarrerarekin.
Marx anaiak bost anaia izan ziren, ospe handia izan zuten komiko estatubatuarrak. Arrakasta handia izan zuten lehenik eta behin vodevilean, gero Broadwayen eta azkenik zineman. edonola ere, taldearen muina Chico, Harpo eta Groucho anaiek osatu zuten, bakoitzak pertsonaia berezi bat antzeztuz.
Broadwayen I 'll Say She Is (1923-1925), Lau kokoak (1925-1928) eta Marxen konfliktoak (1928-1929) lanei esker iritsi zitzaien arrakasta. Zinemarako egin zuten lehen filma Lau kokoak izan zen, 1929an, eta jarraian, beste hamalau egin zituzten. Aipagarriak dira, besteak beste, Gau bat operan, Antzara zopa, Arratsalde bat zirkuan edota Zaldi lumak.