Sagardoa izango da datozen egunetan protagonista Zarautzen. Ohi bezala, biharko egunez, San Sebastian egunaren bezperan, emango diote hasiera denboraldiari Izeta sagardotegian, eta, igandean, Sagardo Eguna ospatuko dute Lege Zaharren Enparantzan. Izeta sagardotegia ere bertan izango da 2023ko uztak emandako produktua erakusten. Zentzu horretan, aurreratu dute aurtengoa "iazkoa baino bigunagoa" eta "edateko errazagoa" dela, eta, "%100ean hemgo sagarrekin egindakoa", gainera.
Biharko txotx irekierari erreparatuta, bestalde, 20:30ean egingo dutela zehaztu dute. Trikitiliariek eta Eñaut Agirre bertsolariak lagunduta egingo dute ekitaldia.