Udaberri jubilatuen elkarteak 2024ko ikastaro eta jarduera ezberdinen matrikulazio epea zabaldu du, eta ostiralera arte egongo da horretarako aukera, urtarrilaren 12ra arte; astelehenetan eta asteartetan, 10:00etatik 12:00etara, eta asteazkenetan eta ostegunetan, 16:00etatik 18:00etara.
Ikastaroei dagokienez, antzerkia, fitnessa, meditazioa, memoria, tai-chia, yoga, dantza, eskulanak eta marrazketa eskainiko dituzte. Era berean, talde jarduera libreak egingo dituzte: bingoa, billar jokoa, laborategia, nordic walking irteerak, mendi ibilaldiak goizez eta irakurketa kluba.
Podologia zerbitzua
Pandemia garaian, bertan behera geratu zen Zarauzko Udalaren bitartez Udaberri elkartean eskaintzen zen podologia zerbitzua. "Ezarri ziren osasun-baldintzak oso zorrotzak izan ziren, eta zerbitzu hori eskaintzen jarraitu ahal izateko inbertsio handia egin behar zenez, ez zen berriro martxan jarri", aditzera eman dute Udaberriko kideek.
Hainbat bazkideren eskaerak kontuan hartuta, Udaberriko batzarra akordio batera iritsi da Zarauzko bi podologia zentrorekin. Horrela, urtarrilaren 15etik aurrera, bazkide-txartela aurkeztuta, Udaberriko bazkideek tarifa berezia izango dute eskaintzen dituzten zerbitzu batzuetan; aldea podologia zentroek eta Udaberrik ordainduko dute.