Urrezko Aizkolari Kopa Txapelketako eta Binakako Harrijasotze Txapelketako finalak jokatu zituzten igandean, urteko azken egunean, Asteasun (Gipuzkoa). Usarrabi pilotalekuan izan ziren herri kirol lehiak, eta gizonezkoen harrijasotzeko norgehiagokan zarauztarrentzat izan zen txapela: Mikel Lopetegi Urra eta Hodei Iruretagoiena Izeta IV.arentzat, hain zuzen.
Denera sei zarauztar lehiatu ziren finalean; aipatutakoez gain, Xabat Olaizola, Ainitze Zumeta, Maddi Gesalaga eta Lierni Osa.
Gizonezkoen mailan, hiru bikote aritu ziren nor baino nor lau harri desberdinekin: 110 jasoaldirekin, Urra eta Izeta IV.a nagusitu ziren, eta bigarren Beñat Telleria lasartearrak eta Gorka Etxeberria oriotarrak egin zuten, 106 altxaldirekin. Xabat Olaizolak eta Inhar Urruzuno ondarroarrak, azkenik, 103 jasoaldi egin zituzten.
Emakumezkoetan, Ainitze Zumeta zarauztarrak eta Udane Ostolaza oriotarrak osatu zuten bikoteetako bat, eta Maddi Gesalaga eta Lierni Osa zarauztarrek bestea. Hirugarrena, azkenik, Karmele Gisasola Zela III.a mallabitarrak eta Aroa Sanchez oriotarrak. Azken horiek gailendu ziren lehian, guztira 80 jasoaldi eginda. Beste bi bikoteek 74na altxaldi egin zituzten guztira.
