Nerea Loiola idazle debarrak Eskapu Liburuak bildumako bigarren lana plazaratu du Durangoko Azokaren atarian. Zarauzko bizilagunak Azken denbora deitu du bigarren abentura proposamena eta Erein argitaletxearen eskutik argitaratu du. Atzo egin zituen lehen aurkezpen lanak Donostian eta etzi egingo ditu Durangon, Ahotsenea Literatura-Musika Eskolan.
Loiolak azaldu duenez, iaz kaleratutako 7G udalekuak lehenengo "eskapu" liburuarekin alderatuta, "konplexuagoa" da bigarrena: "Zailtasun maila apur bat handitu dut, bai istorioaren aldetik eta bai egitura aldetik ere".
Halaber, tramari buruzko hainbat zertzelada eman ditu: "Irakurlea izango da protagonista eta bere lagunik onenarekin bizilagun duten emakume dirudunaren logela margotu beharko du. Hain justu, bertan gertatuko den zerbaitek abiatuko du abentura. Arriskutsua izango da eta denboran aurrera eta atzera egingo du irakurleak. Bidean erronka handiak aurkituko ditu eta haiei aurre egiteko ondo hausnartu beharko ditu erabakiak; izan ere, asmatuz gero, gizarte osoa salbatuko du".
Goizean aurkeztu dugu Donostian @nerealoiola -ren «Azken denbora» liburua, «Eskapu liburuak» bildumako bigarrena✨
— Erein argitaletxea (@ereinargi) December 4, 2023
Amaieran hauxe kontatu digu idazle debarrak laburrean 👇👇 pic.twitter.com/QIu9n7Br26