Nadia Erostarbek Espainiako Surf Selekzioaren deia jaso du beste urte batez Munduko Txapelketa lehiatzeko. Otsailaren 22tik martxoaren 2ra izango da Puerto Ricoko Margara hondartzan eta Parisko Olinpiar Jokoetarako azken txartelak ere banatuko dituzte bertan.
Erostarbe da, gainera, Espainiako Selekzioak deitu duen herriko ordezkari bakarra. Irailean jokatutako txapelketan hiru izan ziren Espainiaren izenean aritu ziren zarauztarrak, Adur Amatriain eta Aritz Aranburu ere sartu baitzituzten deialdian. Oraingoan, ordea, kanpoan geratu dira. Haiekin batera, Keoni Lasa ere aritu zen Munduko Txapelketan, baina Venezuelako selekzioarekin egin zuen.
Dena den, eskualdeko beste surflari batek ere lagunduko du Erostarbe Puerto Ricoko Munduko Txapelketan; izan ere, Janire Gonzalez Etxabarri zumaiarra ere hautatuen artean dago.
Ezin Iberdrola liga errematatu
Surflari zarauztarrari lotuta, era berean, Kanarietan izan da joan den asteburuan Iberdrola ligako azken proba jokatzeko, Las Palmas Kanaria Handikoan. Esku-eskura zuen Erostarbek Espainiako zirkuitua irabaztea eta gertu izan zuen garaipena, gainera, probako finalera sailkatu baitzen. Azken unean, ordea, ihes egin zion eta Melania Suarez kanariarrak irabazi zituen proba zein zirkuitua. Azken horretan, ezinbestekoa izan zitzaion Ariane Otxoak lortutako bigarren postua; izan ere, segundo gutxiren faltan aurreratu zuen zarauztarra.
Ruben Vitoria eta Adur Amatriainek ere hartu zuten parte Las Palmas Kanaria Handikoan jokatutako azken proba horretan, baina finalaren atarian geratu zituzten biak. Finalaurrekoetan kanporatu zituzten.
