Santa Zezilia Eguna ospatzeko, Imanol Urbieta Musika Eskolako ikasleak eta irakasleak kalera aterako dira datorren ostegunean, hilaren 23an, herriko kaleak musikaz girotzera. Urtero bezala, musika eskolatik abiatuko dira, 17:30ean.
Hiru kalejira antolatu dituzte, hiru multzotan banatuta, eta bakoitzak bere ibilbidea egingo du kalez kale. Alde batetik, haizezkoak joango dira; bestetik, tailerreko eta solfeoko haurrak; eta hirugarrenik, trikitilariak eta pandero-jotzaileak. Ondoren, Musika Plazan elkartuko dira guztiak, eta pare bat kanta abestuko dute elkarrekin; kalejirakoak iritsi bitartean, piano eta biolin jotzaileak ariko dira kioskoan jotzen.
Ohiko moduan, ekitaldi biribildu ostean, txokolatada batekin amaituko dute festa.