Finalaren atarian geratu da Nadia Erostarbe Angelun (Lapurdi) jokatutako surf txapelketan, Europako QS zirkuituko garrantzitsuenetakoa. Hirugarren postua lortu du zarauztarrak eta bildutako puntuei esker zirkuituko sailkapen nagusiko hirugarren postuan jarraitzen du, Challenger Series zirkuitura bide ematen duten ohorezko postuetan.
Zarauzko surflaria txapelketa irabazi zuen Teresa Bonvalot portugaldarraren aurka aritu zen Angeluko txapelketako finalerdietan eta 0.47 puntuko aldeagatik egin zion ihes finalak. Buruz burukoa amaitzeko lau minutu eskasen faltan hartu zuen aurre Bonvalotek eta Erostarbek ezin izan zuen aurkariak lortutako 10.07ko puntuazioa hobetu.
Zarauztarra emaitza bolada onari jarraipena ematen ahaleginduko da aste honetan bertan; izan ere, beste proba garrantzitsu bat izango du Galizian. Pantinen arituko da bihartik igandera bitartean.