Lehertu da Aste Nagusietako festa Zarautzen. 12:00etan puntu-puntuan jaurti dute txupina udaletxeko balkoitik eta eztanda egin bezain pronto, banderak altxa eta kalejirari ekin diote. Buruhandian joan dira aurretik bidea egiten eta atzetik jarraitu dituzte erraldoiek, Zarauzko erraldoi txikiek eta ibilbidea musikaz girotzeko lagun izan dituzten Jainekin txarangako kideek. Haiekin batera, hamarnaka familiek hartu dituzte herriguneko kaleak, Musika Plaza era Lege Zaharren enparantza.
Behin festari hasiera emanda, igandera arte luzatuko dute eta egunero izango da zer egina. Iluntze partean batik bat.
