Zarautz Futbol Taldeko gizonezkoen lehen taldeak entrenatzaile berria izango du 2023-2024 denboraldian: Joseba Roteta oiartzuarra. Klubak nabarmendu du Rotetak esperientzia handia duela Ohorezko Erregional mailan, eta, besteak beste, Urnieta, Idiazabal, Añorga, Ostadar, Real Union, Beti Gazte eta Tolosa bezalako taldeak zuzendu dituela.
Bestalde, Xabier Otermin Xixa entrenatzaile ohiari eskerrak eman nahi izan dizkio klubak "azken hamar urte hauetan maila eta talde ezberdinetan –Futbol Eskola, Jubenil Nazionala eta mutilen lehenengo taldea– egindako lan guztiagatik eta uneoro erakutsitako konpromiso, profesionaltasun eta dedikazioagatik. ZKEko ateak zabalik izango dituzu beti".