Photomuseum Argazki eta Zinema Museoan zinemako iraultza zibernetikoari buruzko proiekzio sorta antolatu dute, kultur hedapenerako Gela programaren barruan, eta gaur sail horren bigarren saioa izango da, 18:00etan hasita; doako sarrera izango du, edukiera bete arte.
Oraingoan, Philip K. Dicken Androideak amets egiten dute ardi elektrikoekin eleberrian oinarrituta sortutako fikzioa aztertuko dute. Liburuaren lehen egokitzapena Blade Runner (1982) filma izan zen, Ridley Scottek zuzendua, eta haren segida aipagarria, Denis Villeneuvek zuzendutako Blade Runner 2049 (2017). Bestalde, bost bideojoko ofizial kaleratu dira, eta baita komiki eta anime serieak ere.