Udako kontzertua eskainiko du Zarautz Abesbatzak larunbatean, Santa Maria parrokian. 21:30ean hasiko da emanaldia, eta jakitera eman dutenez, modalitate ezberdinetako 13 kantu prestatu ditu Zarautz Abesbatzak kontzertu honetarako. Berezia izango da aurtengo zita, izan ere, 40 urte bete ditu taldeak, eta instrumentu anitzeko kantaldia antolatu dute arrazoi horregatik.
Kontzertuan parte hartuko dute Zarautz Abesbatzako kideez gain, Zarazte Abesbatzak; organoan Joxe Iturria; teklatuan Antxon Sarasua; perkusioan Iker Muguruza; Zarauzko Musika Bandako musikariak; euskal txirularekin Jose Inazio Elias eta Zarauzko Imanol Urbieta Musika Eskolako biolin-jotzaileak.