2022-2023 ikasturtean euskalduntze eta alfabetatze ikastaroak egin dituzten Zarauzko bizilagunek udalaren dirulaguntzak eskatzeko azken eguna dute biharkoa. Horretarako, udaletxeko HAZ Herritarren Arreta Zerbitzura jo dezakete edota udalaren egoitza elektronikoaren bitartez. Aurrez aurreko arretarako 07:30etik 15:00etara bitartekoa da HAZ bulegoetako gaurko eta biharko ordutegia.
Edonola ere, baldintza batzuk ere bete beharko dituzte dirulaguntza eskatu nahi duten herritarrek: batetik, Zarautzen erroldatuta egotea ikastaroa gauzatu duten epean, eta bestetik, eskolen %80 jaso izana, gutxienez. Udalak jakinarazi du, halaber, ikastaroak udako hilabeteetan, uztailetik irailera bitartean, egingo dituzten herritarrek ere izango dutela dirulaguntzak eskatzeko aukera. Irailaren 22ik urriaren 5era arteko epea izango dute horretarako.
Udalak azaldu duenez, herriko elebidun kopuruak gora egitea da dirulaguntza hauen xede nagusia: "Herritarren %74 elebiduna da Zarautzen eta Udalarentzat oso garrantzitsua da kopuru horri eustea, eta ahal bada gehitzea".