Gutxigatik, baina Gesalaga-Okelan Zarautz Rugby Taldeak ezin izango du estatuko maila gorenera igotzeko finala jokatu. Hiru punturen aldegatik irabazi zion atzo Mazabi Santander Independiente RC (Kantabria, Espainia) taldeari finalaurrekoaren itzuliko partidan: 18-15. Hori horrela, garaipena ez zen aski izan kanporaketa iraultzeko; izan ere, lau puntuko errenta eskuratu zuen Santanderreko taldeak joanekoan: 17-13.
Alcobendas (Madril, Espainia) izan da finalera sailkatu den beste aldea, mailaz igotzeko hautagai nagusia, eta nagusitasunez egin du, gainera. Finalaurrekoetako kanporaketako bi partidak aise irabazi ditu: 9-40 joanekoan eta 47-26 larunbatean jokatutako itzulikoan.