Imanol Urbieta udal musika eskolak ateak zabalduko ditu larunbatean datorren ikasturteari begira ikasleak erakartzeko. Hala, zentroko arduradunek jakinarazi dute musika eskola bisitatzera animatzen diren herritarrek mugimendu gelak eta musikoterapia gunea bertatik bertara ikusi ahalko dutela, baita instrumentu guztiak ere. Azken horren harira, zehaztu dute musika tresnak probatzeko aukera ere izango dutela.
Bada, honako instrumentuak jotzen ikasteko aukera dago Imanol Urbieta musika eskolan: biolina, biolontxeloa, bonbardinoa, gitarra, klarinetea, pandero, perkusioa, pianoa, saxofoia, trikitixa, tronboia, tronpa, tronpeta, txistua eta zeharkako flauta.
Musika eskolak zehaztu du, halaber, maiatzaren 15ean zabalduko duela ikastaro horiek gauzatzeko aurrematrikulazio epea. Hori bai, datorren astean emango du aurrematrikulazio horri loturiko informazio xeheagoa.