Zarauzko gaztetxe berriko musika egitaraua hasi da martxa hartzen. Horren erakusle da hirugarren astez jarraian eskainiko dituztela kontzertuak bihar arratsaldean. Apirilaren 7an eskaini zituzten lehenengoak ZarataZarautzek antolatuta eta joan den larunbatean ere izan zen musikaz gozatzeko aukera inaugurazio ekitaldian. Biharko saioa ere ZarataZarautzek antolatu du eta 20:00etan hasiko da.
Hiru talde igoko dira orotara Hiruputzu gaztetxeko oholtza gainera, Bilboko Gurs eta Blessure eta Lyongo (Frantzia) Litige. Emanaldia ikusteko interesa dutenek sei euroan izango dituzte sarrerak eta antolatzaileek ohartarazi dute ez dutela inongo erasorik onartuko.