Torre Luzean ikusgai dagoen Vulkanoren sutegia erakusketa aitzaki hartuta, gaur hitzaldia eskainiko du lagin honen egilea den Pio Guerendiain argazkilari nafarrak. Torre Luzean bertan izango da, 18:30ean jarri dute hitzordua.
Photomuseumek sustatutako ekimenez, hitzaldia erakusketara hurbiltzeko aitzakia izango da. Argazkilari nafarrak bere ibilbidea errepasatuko du eta Iruñeko La Mañueta txurro-denda mitikoan egindako bere argazki sortaren inguruan hitz egingo du. Dendaren atzealdean eginiko berrogei argazki horietan, Elizalde Fernandez familiaren lana omendu nahi izan du, negozio horretan 150 urte bete dituzten txurro saltzaileen sei belaunaldiena, hain zuzen.