Iñurritza jubilatu eta pentsionisten elkarteko kideek egun entretenigarria izan zuten atzo. Karta jokoan aritu ziren txapelketa azkarrean, eta antolatzaileen esanetan, "gozatua" hartu zuten parte hartzaileek. Horregatik, "arrakastatsua" izan zela diote.
Zehazki, hiru izan ziren antolatu zituzten lehiaketak: batetik, mus txapelketa, zeina Marce Camposek eta Jesus Maria Lizasok osatutako bikoteak irabazi zuen; bestetik, seiko txapelketa, non Paki Aguayo eta Teo Gonzalez nagusitu ziren; eta, azkenik, eskoba txapelketa. Karmele eta Rosario Olaskoaga ahizpak gailendu ziren horretan.
Txapeldun guztiek sari ederrak ere jaso zituzten, noski. Txuleta eta ardo kaxa, hain justu ere. Azpi txapeldunek, berriz, kafea, iberikoak eta ardo botila bat. Sari guztiak herriko negozioek emandakoak izan ziren, izan ere, Biyona, Templo, Lukas, Borda eta Gesalagak babestu zuten txapelketa.