Hainbat hedabidek jakitera eman dutenez, 44 urteko gizonezko batek 45 urteko emakume bat hil du Bilboko San Frantzisko auzoko taberna batean. Ustezko hiltzailea bera izan da udaltzainei 09:00etan abisua eman duena, eta atxilotu egin dute. Antza denez biak ziren tabernako arduradunak, baina hortik harago zein harreman zuten ez du zehaztu Ertzaintzak. Hainbat albiste agentziaren arabera, ordea, senar-emazteak ziren.
Dena dela ere, gertaera salatzeko protesta deialdi ugari egin dituzte Euskal Herri osoan, tartean Zarautzen. Urola Kostako Itaiak mobilizazioa deitu du bihar 18:30ean Lege Zaharren enparantzan, eta Zarauzko Bilgune Feministak eta Morroxkak taldeak elkarretaratzea etzirako 19:00etan. Lege Zaharren enparantzan bilduko dira hauek ere.