Haur Kultur Taldeak haurrentzat egitarau oparoa antolatu du Gabonetarako, eta atzo eman zioten hasiera Haurren Gabonetako Hamabostaldiari. Musika Plazan elkartu ziren haurrak, eta txikienek Gabonetako apaingarriak margotzen zituzten bitartean, gaztetxoagoak, taldetan banatuta, Alde Zaharrean barrena korrika ibili ziren, jende artean mozorrotuta zeuden begiraleen bila.
Urtarrilaren 3ra arte iraungo du Haurren Gabonetako Hamabostaldiak, eta jarduera ugariz gozatzeko aukera izango dute etxeko txikiek: haur parkea, puzgarriak, ur-jolasak eta Pirritx, Porrotx eta Marimototsen ikuskizuna, besteak beste.