2023ko udal aurrekontuak osatzeko parte hartze prozesua jarri zuen martxan udalak duela hilabete, eta asteotan hainbat bilera egin ditu auzoz auzo, herritarrek iritziak eman eta ekarpenak egin ahal izateko. Bilerak arrakastatsuak izan direla azaldu du udalak ohar bidez, "bai parte hartze aldetik, baita jasotako ekarpenen aldetik ere". Jesus Arana Partaidetza zinegotziaren arabera, "herritarrekin harreman zuzena izateak entzute prozesuaren kalitatea handitzen du". Gaineratu du herritarrengandik jasotako eskaera batzuk, azterketa tekniko-ekonomikoa egin ondoren,, "2023ko aurrekontuetan sartzeko aukera" izango dutela, "Eta beste batzuk, txikiagoak izanik, horrelako esku hartzeak egiteko urtero aurreikusten diren partidetan barneratuko dira".
Bileretan nahiz parte hartzeko zabaldu diren bestelako bideetatik jasotako ekarpenak banan-banan aztertuko ditu udalak orain, eta zehaztuko du horietako zeintzuk sartuko dituen aurrekontuetan. Ondoren, Udal Gobernuak ondutako proposamenak Udalbatzaren onespena jaso beharko du urtea amaitu baino lehen.